الكشف الطبي للمهاجرين الجدد في بلدك

اعزائي الكرام المهتمين بالسفر والهجره الي امريكا سوف نتحدث اليوم في هذا الموضوع عن الكشف الطبي بعدما أنهينا حديثنا في الموضوع السابق عن تجهيز الاوراق المطلوبه منك كمهاجر جديد و سوف نتبع نفس الأسلوب السابق حيث سيكون الموضوع بالعاميه المصريه و مع الشرح بالتفصيل لنضمن سهوله الفهم للقراء

الكشف الطبي :

الكشف بيتم فى القاهرة فى مستشفيتين :

الاولى مستشفى الانجلو اميركان و دى مكانها فى الزمالك فى الشارع اللى فيه برج القاهرة جنب النادى الاهلى

التانيه مستشفى الشروق التابعه لمجموعه مستشفيات كليوباترا و دى فى شارع احمد عرابى فى منطقه المهندسين

و الكشف فى اسكندرية فى مستشفى الدكتور عمرو ماهر فى جليم عند محطه الترام تقريبا مبقاش موجود خلاص

هتكلم عن الشروق و الانجلو

اولا مستشفى الانجلو

زى ما قولت عنوانها و لازم يتم الاتصال عشان تحجز قبلها باسبوع الى 10 ايام

ممكن تتصل بالرقم ده 01224463734

المطلوب صور 3*4 او 4*6 خلفيه بيضا بدون اى تعديل 6 صور

الباسبور وصور منه + جواب الفوز التاني او جواب المقابلة وصور منه + عنوان امريكا

ولو بتلبس نضارة خدها معاك ولو عندك اطفال خد شهادة الميلاد اللي في ضهرها التطعيمات او الدفتر و بيعملوا ورقه لوحدها بالتطعيمات بتستلمها مع نتيجه الكشف

الكشف و تحليل الدم فى نفس المكان فى المستشفى و بتخرج بره تعمل التطعيمات فى المصل و اللقاح و ترجع تديهم الكارت زى اللى فى الصورة

حقنتين ب 181 جنيه

و بتستلم النتيجه بعد حوالى 10 ايام او اقل

تكلفه الكشف 2100 جنيه

ثانيا مستشفى الشروق

فى شارع جانبى كده فى العيادات الخارجيه بتروح تكشف اى يوم بدون حجز من الساعه 9 الى الساعه 12 ما عدا يوم الجمعه

بيحتاجوا صورتين شخصتين 5*5 او 4*6 + جواز السفر و صور منه

جواب المقابلة + عنوان امريكا

بتعمل الكشف الطبى فى المستشفى و بتخرج بره تروح معمل تحاليل

دكتورة " شهيرة جميعي" قريب من المستشفى بس بتركبله تاكسى مثلا

و عنوانه فى 14 شارع شهاب و بتدفع 1250 للفرد طبعا

و تروح برضه المصل و اللقاح تاخد التطعيمات اللى هيقولولك عليها

مجموع الكشف برضه للفرد 2100

و الطفل 500 جنيه

***********

الكشف عبارة عن (باطنه - وزن - نظر- بتاخد ادوية - عملت عمليات- بتدخن- اشعه صدر -تحاليل دم و بول - تطعيمات عبارة عن حقنتين )

فى الاخر المصاريف المتوقعه

الكلام ده كله للفرد الواحد

١- جواز السفر 600 جنيه

٢- شهادة ميلاد مترجمه من العباسية ١٦٥ جنيه

٣- قسيمة الزواج للمتزوجين مترجمه برده من العباسية ١٦٥ جنيه

٤- الفيش الجنائى 50 جنيه

٥- بيان نجاح ثانوى او دبلوم مترجم من ادارة الامتحانات 30 جنيه

٦- شهادة المؤهل العالى من الجامعه مترجمه من ٧٠ الى ١٥٠ جنيه

٧- شهادة بالتطعيمات للاطفال من وزارة الصحه مترجمه 100 جنيه

٨- ترجمه اى ورقه محتاجه ترجمه من ٦٠ الى ١٥٠ جنيه للورقه

٩- الكشف الطبى قبل المقابلة للكبار ٢٤٠٠ جنيه تقريبا

للاطفال حوالى ٧٠٠ الى ٩٠٠ جنيه

١٠- مصاريف المقابلة بتدفعها فى السفارة ٣٣٠ دولار

١١- رسوم الجرين كارد تدفعها اونلاين قبل السفر ٢٢٠ دولار

١٢- تذكرة الطيران حسب الوقت و الشركه من ٥٠٠٠ الى ١٥٠٠٠ جنيه

١٣- مصاريف شخصيه فى اول فتره مش اقل من ٢٠٠٠ دولار

و طبعا ده غير تمن التصوير لصورة الهجرة فى التقديم بحوالى من ٢٠ ال ٨٠ جنيه

امريكا مش بتجيبلك شقه و لا شغل

انتا بتروح تأجر شقه و تدفع ايجارها

و انتا بتدور على شغل و تشتغل

ملحوظة هامة:

لازم تتاكد ان الاسم واحد في كل الورق زي الباسبور بالظبط

لازم تروح تشوف الموضوع بتاع تجهيز الاوراق المطلوبه منك طبعا عشان تعرف كل الإجراءات

و ربنا يوفقكم كلكم ان شاء الله و تحققوا كل اللى بتتمنوه